西甲　C朗低迷插水冇品　皇馬遇弱僅勝

即上英超刨績王：http://win.on.cc/epl　

上仗意外落敗，今輪西甲皇馬亦飽受壓力，作客僅勝艾拉維斯2:1。巨星C朗於停賽5場後，狀態同巔峰時爭得遠，今仗佢射極唔入勁黑仔，為喺聯賽開齋，竟於禁區內肉酸插水。若非對手兩度中柱，銀河艦隊睇怕又會失分，賽後教練施丹話最緊要3分已袋，佢深信皇馬同C朗嘅表現，未來只會愈來愈好。

C朗上仗坐完波監復出，皇馬就於主場不敵貝迪斯，冇到呢位葡萄牙隊長勁冇癮，今仗佢踢得好落力，先靚傳馬高阿辛斯奧出波，造就21歲中場丹尼施巴路斯建功先開紀錄。皇馬於40分鐘被追平，好彩丹尼施巴路斯跟手再入1球，半場領先2:1。換邊後，主隊艾方素柏祖沙兩度射中柱，搞到皇馬門前風聲鶴唳，而C朗亦忘帶射門鞋，其中一球佢於右路扣入中路，起左腳射遠柱勁靚，不過就中楣唔入。眼看美斯已有9個聯賽入球，C朗當然想急起直追，但腳風唔順令佢衰到要於禁區插水，慢鏡睇番敵衞根本睇唔到佢，C朗挨埋人度自己舉手扮跌，假到咁當然呃唔到球證。最後皇馬僅勝2:1完場。

C朗於上仗復出後，狀態只屬一般，2仗佢合共起腳18次，可惜1球不入。主力操唔起，加上球隊整體表現麻麻，施丹定個抬油：「若只睇表現，皇馬今仗的確冇乜亮點，但最緊要球隊攞齊3分。對手今場打得好好，所以贏波已經心足。C朗一向都係咁可靠，我知道佢會好快回復水準，就好似往常一樣。」

皇馬贏得險，但巴塞就輕輕鬆鬆繼續贏到開巷，作客基羅納憑對手2個烏龍波，以及蘇亞雷斯錦上添花，大勝3:0完場，聯賽6連勝後續排榜首，領先皇馬7分。

東網體育同你追實體壇每個精彩時刻！
http://bit.ly/2ecTF2A　

本文來源：http://hk.on.cc/hk/bkn/cnt/sport/20170924/bkn-20170924060920236-0924_00882_001.html